iKomp 2025 (Nynorsk)

iKomp er ei generell innføring i informasjonskompetanse. Informasjonskompetanse omfattar kunnskapen, ferdigheitene og haldningane vi treng for å finne, vurdere og bruke informasjonskjelder effektivt og føremålstenleg for å svare på spørsmål, løyse problem, skape kunnskap og lære.

iKomp er bygd opp som eit ope, digitalt og fleksibelt nettkurs. Det kan takast åleine som sjølvstudium, men utbytet blir betre dersom det vert brukt som eit grunnlag for vidare øving og diskusjon i dei ulike emna du tek i utdanninga di. Kurset består av tekstar, videoar, aktivitetar og kvissar. Hovudmålgruppa er studentar ved universitet og høgskular, men kurset er ope for alle som ønskjer å heve kompetansen sin i kjeldebruk i fagleg samanheng. Om du høyrer til eit av studieprogramma ved UiT som omfattar ei obligatorisk opplæring i informasjonskompetanse og akademisk skriving, er det sannsynleg at det å gjennomføre og bestå iKomp er eit arbeidskrav tidleg i studieprogrammet. Avhengig av kor mykje du kan frå før, tek det 8–10 timar effektiv arbeidstid å gjennomføre iKomp. Når du har bestått eksamen i kurset, kan du laste ned eit kursbevis.

iKomp er utforma for å bidra til at du skal kunne ...

• identifisere kjenneteikn på kvaliteten til kjelder, slik desse vert forstått i relevante faglege og profesjonelle samanhengar.
• ha kjennskap til redeligheit, integritet og god skikk i akademisk kjeldebruk, inkludert kunnskap om plagiat.
• finne, velje ut og få tilgang til faglege kjelder.
• følgje faglege konvensjonar og gjevne regelverk for å vise til og føre referanseliste over kjelder brukte i eigne faglege arbeid.
• unngå plagiat og uetisk gjenbruk av eigen tekst.
• bruke ferdigheiter og kunnskapar i kjeldebruk til å oppdatere eigen fagkunnskap, belyse faglege problem og delta i fagleg diskurs.